Isang Ina, Pitong Pangarap: Ang Laban ng Isang Solo Parent
Ako po si Nena Nanol Gepulango, isang solo parent mula sa Purok 4, Dampil, Lagonglong, Misamis Oriental, Region X. Sa kabila ng lahat ng unos na aking dinaanan, nananatili akong matatag at kumakapit sa paniniwala na ang kahirapan ay hindi kailanman hadlang sa pag-abot ng pangarap, bastaโt may tiyaga, determinasyon, at pananampalataya sa Diyos.
Ako ay nakapagtapos ng Bachelor of Agriculture and Technology (BAT) bilang full scholar ng Republic of the PhilippineโEuropean Economic Community (RPEEC) sa Misamis Oriental State College of Agriculture and Technology (MOSCAT), Claveria, Misamis Oriental. Hindi doon nagtapos ang aking pag-aaral, dahil pinanday ko rin ang aking kakayahan sa pamamagitan ng mga pagsasanay tulad ng Crop Production NCIII na inisponsor ng Agricultural Technology Institute (ATI) at Computer Hardware Servicing NCII mula sa programang 4Ps, DSWD, at Goodwill Technical Skills and Computer College Inc. Isa rin akong tumanggap ng Leadership Award mula sa Pantawid Pamilyang Pilipino Program (4Ps) ng DSWD Lagonglongโisang patunay na kahit sa gitna ng hirap ay maaari tayong maging ilaw at gabay ng iba.
Hindi naging madali ang lahat. Ako ay may pitong anakโsina Merian, Meryniel, Merliza, Maria Ellaine, Maria Lalaine, Francis Ian, at Mitz Camille. Sa bawat araw na lumilipas, dala ko ang mabigat na responsibilidad ng isang ina at ama na sabay na nagsasakripisyo upang matugunan ang kanilang nutrisyon, edukasyon, at kinabukasan. Ang pagiging magulang na mag-isa ay hindi biro, ngunit ito rin ang nagturo sa akin kung paano maging mas matibay, mas mapagmahal, at mas matatag sa kabila ng lahat ng pagsubok.
Sa aking paglalakbay, hindi lamang ako naging haligi ng tahanan, kundi naging aktibong bahagi rin ng komunidad. Nagsilbi ako bilang Federated President ng 4Ps Parent Leaders sa loob ng labindalawang taon, President ng Fisherfolks Association, at Barangay Tribal Chieftain ng Higaonon Tribe. Ako rin ay naging Homeroom PTA Secretary ng Dampil National High School, Social Manager ng Womenโs Association, at patuloy na nakikibahagi sa Basic Ecclesial Community (BEC) ng Simbahang Katoliko. Para sa akin, ang tunay na pamumuno ay hindi nasusukat sa posisyon, kundi sa taos-pusong serbisyo para sa kapwa.
Ngunit bago ang lahat ng tagumpay, dumaan kami sa matitinding pagsubok. Ako ay nagkasakit ng Acquired Pneumonia at naoperahan sa Northern Mindanao Medical Center (NMMC) sa Cagayan de Oro City. Bilang 4Ps beneficiary, natulungan akong makapagpagamot nang libre, ngunit ipinayo ng doktor na kailangan kong magpahinga ng dalawang taon. Sa panahong iyon, halos mawalan kami ng pag-asaโnalubog kami sa utang, at madalas ay wala kaming makain. Subalit sa gitna ng dilim, doon ko nakita ang liwanag ng aking mga anak. Sila mismo ang nagbenta ng mani, peanut roll, yema, at iba pang pagkaing gawa sa bahay upang makatulong sa gastusin. Ang kanilang sipag at malasakit ang naging inspirasyon ko upang muling bumangon at ipagpatuloy ang laban.
Totoo nga ang kasabihang โEducation can break poverty.โ Ito ang naging gabay ng aking mga anak. Sa kabila ng hirap, hindi sila sumuko sa pag-aaral. Ngayon, isa isa nang natutupad ang mga pangarap ng aking mga anak. Ang panganay kong si Engr. Merian N. Gepulango ay isa nang Licensed Civil Engineer, DOST Scholar, 4Ps Exemplary Child 2013, Most Outstanding Student mula preschool hanggang kolehiyo, at kasalukuyang Engineer II sa Provincial Engineering Office ng Misamis Oriental. Ang ikalawa kong anak na si Meryniel ay graduating student ng BS in Civil Engineering sa USTP, isang TES at IKNB Scholar, at deanโs lister. Ang aking ikatlong anak na si Merliza ay nag-aaral ng Bachelor in Midwifery sa Salay Community College at deanโs lister din. Ang kambal, na sina Maria Ellaine at Maria Lalaine, ay kumukuha ng BS in Electro-Mechanical Technology at BS in Energy System and Management sa USTP, may honors din noong Senior High. Ang aking bunsong lalaki na si Francis Ian ay nasa Grade 11 at aktibong lumalahok sa sports at gawaing simbahan, habang ang pinakabunso kong si Mitz Camille ay nasa Grade 8 at patuloy na nagtatamo ng honors sa Dampil National High School.
Bilang isang ina, walang katumbas na kaligayahan ang makita ang bawat anak na unti-unting nakakamtan ang kanilang mga pangarap. Ang kanilang mga tagumpay ay hindi lamang para sa kanila, kundi para sa aming buong pamilya at para sa komunidad na aming pinaglilingkuran.
Kayaโt buong puso kong sinasabi: ang edukasyon ang tunay na susi upang malampasan ang kahirapan. Hindi kailanman magiging sagabal ang kahirapan sa taong may pangarap, sipag, at pananampalataya. Ang lahat ng aming pinagdaanan ay nagpapatunay na ang hirap ay maaari lamang maging pansamantalang balakid, ngunit hindi kailanman magiging hangganan ng pangarap.
Lubos ang aking pasasalamat sa Pantawid Pamilyang Pilipino Program (4Ps) na naging katuwang namin sa laban ng buhayโsa larangan ng edukasyon, kalusugan, at paghubog ng positibong pananaw. Kasama ang aking mga anak at ang komunidad, patuloy kaming lumalaban, nagsusumikap, at naniniwala sa pag-asa.
Ako si Nena Nanol Gepulango, isang solo parent, isang lider, isang ina, at higit sa lahatโisang buhay na patunay na ang pinakamabigat na pagsubok ay kayang pagtagumpayan kung may lakas ng loob, pagmamahal, at pananalig sa Diyos.
#4PsNationalFamilyCongress2025
###
