Titulo sa yuta gitunol ni Mayor Moreno sa mga benepisyaryo

TALIWALA sa giatubang nga problema sa panglawas tungod sa COVID-19, apan nagpadayon gihapon ang mga programa sa administrasyon ni Mayor Oscar Moreno sama sa land titling program diin 11 ka mga benepisyaryo ang nakadawat sa ilang titulo sa yuta karong adlawa, Agosto 4.
Ang kalihokan gipangulohan ni Mayor Moreno, Kagawad Edgar Cabanlas nga maoy chairman sa Task Force for Emancipation of Piso-Piso Beneficiaries/Land Asset Management Office (TFEPB/LAMO), Maria Lourdes Gaane, Roger Abaday ug John Michael Seno, City Administrator Teddy Sabuga-a, uban nila ni DENR-10 Assistant Regional Director for Technical Services Aldrich Resma, ug NHA-10 Regional Manager Engr. Rolando Teves Jr.
Alayon niini, gipasalamatan ni Mayor Moreno si Vice Mayor Raineir Joaquin Uy ug ang mayoriya sa City Council sa hugot nga pagsuporta sa iyang mga programa, ingon man sa mga partner agencies DENR, NHA ug uban pang stakeholders nga maoy hinungdan nga nagmalampuson ang land titling program sa syudad.
Lakip usab sa iyang gipasalamatan si Engr. Armen Cuenca, executive director sa TFEPB uban sa iyang mga personahi ingon man sa tibuok bureaucracy sa city hall. “Kining timing sa pag-apod-apod sa titulo could not have been better especially in this difficult, critical and uncertain time,” dugang ni Mayor Moreno.
Si Engr. Cuenca namahayag nga ang mga benepisyaryo gikan sa Barangay Tumpagon (7), Isla Cupa sa Brgy. Consolacion (3) ug KAHOA sa Brgy. Kauswagan (1).
Tungod niini, gipahalipayan ni Mayor Moreno ang mga benepisyaryo tungod kay hingpit na nilang gipanag-iya ang yuta nga gitukuran sa ilang panimalay ug dili na mabalaka nga sa ilang pagmata papahawaon sila.
Subling gipahinumduman ni Kag. Cabanlas ang mga benepisyaryo nga ampingan ang titulo sa yuta tungod kay mao kini ang bugtong handumanan nga ikabilin sa ilang mga anak.