Misaad si Department of Environment and Natural Resources (DENR) Secretary Ma. Antonia “Toni” Yulo-Loyzaga nga panalipdan ang indigenous species ug moresponde sa climate emergency.
Iyang gibutyag nga kinahanglan natong hatagan gilayon og aksyon ang climate emergency pinaagi sa paghimo sa mga pamaagi nga mokunhod ang climate change. Dili lang gikan sa natural hazards apan kadtong gikan usab sa industriya ug binuhatan sa katawhan. Kining mga peligro moresulta sa kadaut ug hulga sa atong ekonomiya ug sa sistema sa katilingban, si Loyzaga niingon.
Matud pa niya nga kinahanglan padayonon ang pagpanalipod sa atong indigenous species kay kini parte sa atong natural heritage ug magamit kining kahinguhaan para sa kaayuhan sa atong nasud.
Nagtinguha siya nga ang tanan mo-apil niining bag-ong misyon ug gilauman niya ang kolaborasyon. Dugang pa niya nga bukas ang iyang opisina ug giawhag niya ang tanan nga dili magpanuko sa pagsulod aron ipaambit ang hunahuna ug kabalaka,” si Loyzaga niingon.
Gusto niyang maghimo og resilient communities kauban ang ubang ahensya sa gobyerno pinaagi sa pagresponde sa mga peligro nga mahitabo ug ibalanse ang kalamboan sa kahinguhaan subay sa gitawag nga natural-rural-urban transect.
Gusto usab niyang magtrabaho uban ang mga lokal nga kagamhanan tungod kay sila ang nagpadagan sa kalamboan, ug nagdepende sila sa ecosystems nga mao usab ang gasuporta sa ila.
Niadtong Hulyo 12, si Presidente Ferdinand R. Marcos, Jr. nituboy ni Loyzaga isip hepe sa DENR. Siya mao ang chairperson sa International Advisory Board sa Manila Observatory diin siya nag-advocate sa scientific research sa climate ug disaster resilience.
Sulod sa siyam ka tuig, siya nagserbisyo isip executive director sa Manila Observatory ug technical adviser sa Philippine Disaster Resilience Foundation.
Membro usab siya sa Senior Advisory Board sa Armed Forces of the Philippines Command and General Staff College.
Ang kalihim sa DENR mao ang gitahasan nga manguna sa mga sugo sa ahensya nga nagtumong nga makonserbar, madumala, mapalambo, ug masustiner ang paggamit sa ecosystems ug natural resources sa nasud. #TayoAngKalikasan (Gikan sa taho sa Strategic Communication and Initiatives Service) RSCIG-07-209-2022
