Usa sa mga tinguha (vision) sa siyudad sa Tangub nga mahimong premier tourist destination. Tungod niini, gisugdan ang nagkalain-laing kalihukan kalabot sa turismo. Usa niini ang pagpahigayon ug indigay sa customer care service sa nagkalain-laing establisimento sa syudad.
Mahinumduman nga ang customer care service gihingusgan ni Mayor Ben ug gisugdan sa buhatan sa City Mayor sukad sa iyang paglingkod isip amahan sa Siyudad. Tumong niini nga mahatagan ug maayong serbisyo ang mga lumulupyo, labi na ang gikan sa bukirang bahin aron dili na magbalik-balik ug subay sa ilang mga tuyo sa opisina. Ang customer care naglangkob sa pag-abi abi sa mga kliyente aron maatiman dayon ang ilang mga tuyo. Kalabot niini ang pag-andam ug comportable nga lingkuranan, kape, biskwit, kendi o tubig samtang naghulat mahuman ang ilang mga katuyoan. Dugang pa, naay gi assign nga mga usherette sa kada dagko nga opisina aron mahatagan ug pagtagad ang tuyo sa kada moabot nga kliyente.
Laing tumong sa customer care service nga mapasinati sa mga tawo mga Tangubanon man o langyaw, kung unsa gayud ang ginatawag nga pulic service. Kini ang pag-abi abi ug pagtagad sa tanang kliyented nga naay tuyo sa mga opisina. Sa kasamtangan, gipalapdan pa ang paghigayon sa customer care service, dili lamang sa mga opisina, giapil na ang mga business establishments sa tibuok siyudad. Tumong niini nga ma professionalize ang serbisyo sa business o sales sector.
Gilauman nga sa pagpahigayon ug indigay or lumba, maningkamot ang kada opisina ug business establishments mahimong kinaiya sa taga Tangub ang pagkama abiabihon. Ang paghukom sa maong lumba gibana bana nga ipahigayon gikan sa bulan sa Mayo padung sa bulan sa Hulyo aron mohatagan ug igong panahon sa pagbansay-bansay sa mga hingtungdan.
