Cebuano News: Anti-smoke belching law ipatuman hingpit sa CdeO

THE REGION
April 12, 2019

SHARE

CAGAYAN DE ORO CITY,  – Gikatakdang ipatuman sa hingpit dinhi sa dakbayan sa Cagayan de Oro ang balaod kontra smoke belching sa umaabot Hunyo 1, 2019.

 Kini ang kasayuran nga nahipos sa buhatan ni bise mayor Kikang Uy human ang City Local Environment and Natural Resources Office (CLENRO) mibutyag sa talamdan sa ilang gipahigayong libreng smoke emission test.

 Matod sa bise mayor nga gikinahanglan nang mapatuman sa hingpit ang balaod aron maprotektahan ang kinaiyahan ingon man ang panglawas sa katawhan gikan sa polusyon dala sa aso nga binuga sa tambotso sa mga sakyanan.

 Nasayran nga sa Cagayan de Oro mokabat sa 60% ang smoke belching violators base sa gihimong pagsusi sa Land Transportation Office (LTO) ug Environmental Management Bureau-Department of Environment and Natural Resources (DENR) Region 10.

 Niini, ang kagamhanan migahin og igong pundo alang sa pagpahigayon sa maong libreng smoke emission test sa tanang sakyanan, pribado man o’ pampubliko.

 Ang kalihokan gisugdan niadtong Abril 1, 2019 ug matapos sa Mayo 31, 2019 aron mahatagan sa kahigayunan ang tanang nanag-iya og sakyanan nga makorehian ang ilang mga kalapasan ug subay usab Ordinance No. 13102-2016 sa konseho ug Clean Air Act 1999 sa nasud.

 Sa kasamtangan gihimo ang libreng test alang sa tanang government vehicles diha sa Gaston Park hangtod sa Abril 12, 2019.

 Alayon niini, ang bise mayor nanawagan sa tanang nanag-iya og sakyanan nga mopahimulos sa libreng emission test.

 Magtambayayong kita aron malimpyo ang atong palibot, panawagan ni bise mayor Kikang Uy.

RELATED ARTICLES

LEAVE A REPLY

Subscribe Now!

Receive email updates from Mindanao Daily News.